ⵡⴰ ⴱⵓ ⵜⴰⵔⵡⴰ, ⵙⵙⵏⵖ ⵜⵓⴳⵜⵜ ⴳⵉⵜⵏⵖ ⵉⵙ ⵜⵏⵜ ⴼⵍⵍⴰⵙ ⵣⵣⵔⵉⵏ ⵉⵎⴰⵔⴰⵡⵏ ⵏⵏⵙ, ⵙⵙⵏⵖ ⵉⵙ ⴷ ⵓⵔ ⵏⴻⵏⴽⵉⵔ ⵢⴰⵜ ⵜⵏⴽⵔⴰ ⵍⵍⵉ ⵙ ⵉⵇⵇⴰⵏ, ⵙⵙⵏⵖ ⴰⵖⵔⴼ ⵏⵏⵖ ⵎⴰⴷ ⴷⴰⵔⵙ ⵉⴳⴰⵏ ⴰⵙⴳⵎⵉ, ⵙⵙⵏⵖ ⵎⴰⵎⵏⴽ ⴰⵙ ⴰⵔ ⵉⵙⵎⵓⵇⵇⵓⵍ ⴳ ⵉⵎⵥⵥⵢⴰⵏⵏ, ⵙⵙⵏⵖ ⵓⵍⴰ ⵉⵎⵥⵥⵢⴰⵏⵏ ⵎⴰⵎⵏⴽ ⴰⵙ ⴰⵔ ⵙⵎⵓⵇⵇⵓⵍⵏ ⴳ ⵡⵉⵍⵍⵉ ⵜⵏ ⵢⵓⴳⵔⵏ !
ⵡⴰ ⴱⵓ ⵜⴰⵔⵡⴰ, ⴰⴷ ⵓⵔ ⵜⵎⵎⴰⵖⵜ ⴰⴷ ⵜⵛⴱⴱⵔⵜ ⴳ ⵜⵎⵢⵓⵔⵉⵏ ⵜⵉⵇⵇⴱⵓⵔⵉⵏ, ⴳⴰⵔ ⵜⵉⵎⵢⵓⵔⵉⵏ ⵍⵍⵉ ⵙ ⴷ ⵏⵓⴼⴰ ⵎⴷⴷⵏ ⵏⴰⵡⵍⵏ ⵜⵏⵜ, ⵜⵉⵎⵢⵓⵔⵉⵏ ⵍⵍⵉⵖ ⵓⵔ ⵉⴳⵉ ⵡⴰⵣⵣⴰⵏ ⴰⴱⵍⴰ ⴰⵣⵣⴰⵏ, ⴰⴷ ⵓⵔ ⵉⵙⴰⵡⵍ ⴳⵔ ⵡⵉⵍⵍⵉ ⵜ ⵓⴳⵔⵏⵉⵏ, ⴰⴷ ⵓⵔ ⵉⵜⵜⵓⵔⴰⵔ ⴳ ⵜⴳⵎⵎⵉ, ⴰⴷ ⵓⵔ ⵉⵜⵜⵓⵔⴰⵔ ⵓⵍⴰ ⵀ ⴱⵕⵕⴰ ⵏ ⵜⴳⵎⵎⵉ, ⵉⵖ ⵏⵏ ⵉⴽⵛⵎ ⵓⵔⴳⴰⵣ ⵙ ⵜⴳⵎⵎⵉ, ⵉⴽⴰⴽⵍ ⵢⵉⵡⵉⵙ ⵙ ⴱⵕⵕⴰ, ⵉⵖ ⵜ ⵉⴷ ⵢⵓⴼⴰ ⴳ ⴱⵕⵕⴰ, ⵉⵙⵙⴽⵛⵎ ⵜ ⵙ ⵜⴳⵎⵎⵉ ...!
ⵜⴰⵔⵡⴰ ⴳⴰⵏ ⴰⴱⴰⵢⵏⵓ, ⵉⵇⵇⴰⵏ ⴷ ⴰⴷ ⴰⵙ ⵏⴼⴽ ⴰⵜⵉⴳ ⵍⵍⵉ ⵢⵓⴽⵍⴰⵍ, ⵉⵙⵙⴰⵏ ⵉⵙ ⵓⵔ ⵔⴰⴷ ⴰⴽ ⵉⵊⵍⵓ ⵢⴰⵜ ⵉⵖ ⴰⵔ ⵜⴹⵚⵚⴰⵜ ⴷ ⵜⴰⵔⵡⴰ ⵏⵏⴽ, ⵉⵖ ⴷⵉⵙⵏ ⵜⴼⴼⵓⵖⵜ, ⵜⵎⵎⴰⵔⵔⵉⵜ ⴷⵉⵙⵏ, ⵉⵖ ⴰⵔ ⴰⵙⵏ ⵜⴻⵜⵜⴰⵍⵙⵜ ⵜⵉⵎⵉⵢⵏⵉⵏ, ⵉⵖ ⴰⵙⵏ ⵜⵙⵖⴰⵜ ⴰⵢⵏⵏⴰ ⵔⴰⵏ, ⵜⴰⵡⵉⵜ ⵜⵏ ⵙ ⵉⵏⵏⴰ ⵔⴰⵏ, ⵉⵖ ⵜⵙⵙⵉⵎⵥⵉⵢⵜ ⵉⵅⴼ ⵏⵏⴽ, ⵜⴳⴳⵓⵣⵜ ⴷ ⴷⴰⵔⵙⵏ, ⵉⵙ ⵔⴰⴷ ⴱⴰⵀⵔⴰ ⵢⵉⵎⵖⵓⵔ ⵡⴰⵜⵉⴳ ⵏⵏⴽ.
ⵉⵙⵙⴰⵏ ⵉⵙ ⴷ ⴰⵢⵍⵍⵉ ⵜⴽⵔⵣⵜ ⴽⴰ ⴰⵔⴰⴷ ⵜⵎⴳⵔⵜ, ⵉⵙⵙⴰⵏ ⵉⵙ ⵔⴰⴷ ⵙⵓⵍ ⵜⵉⵎⵥⵉⵢⵜ ⵉⵎⵖⵓⵔⵏ ⵏⵜⵜⵏⵉ, ⵉⵙⵙⴰⵏ ⵉⵙ ⵔⴰⴷ ⵜⵉⵡⵙⵉⵔⵜ ⵜⵉⵔⵉⵜ ⵎⴰⴷ ⴷⵉⴽ ⵉⵜⵜⴳⴰⵡⴰⵔⵏ, ⴰⵔ ⴷⵉⴽ ⵉⵙⴰⵡⴰⵍ, ⴰⵔ ⴰⴽ ⵉⵜⵜⴰⵍⵙ, ⴰⵔ ⴽ ⵉⵜⵜⴳⴳⴰ ⴳ ⵓⵙⴰⵜⴰⵍ ⵏ ⵓⵎⴰⴹⴰⵍ ⵏⵏⴰ ⴽ ⵉⴼⵍⵏ. ⵉⵙⵙⴰⵏ ⵉⵙ ⵔⴰⴷ ⵙⵓⵍ ⵓⵔ ⵜⵉⵥⴹⴰⵕⵜ ⴰⴷ ⵜⴼⵜⵜⵓⵜ ⵙ ⵓⵊⵎⵉⵔ ⵉ ⵡⴰⴹⵓ ⵏⵏⴽ, ⵓⵔ ⵔⴰⴷ ⵙⵓⵍ ⵜⵣⵎⵔⵜ ⴰⴷ ⵜⵙⵙⵉⵔⴷⵜ ⵉ ⵢⵉⵅⴼ ⵏⵏⴽ ⴳ ⵓⵔⴰⴷⴰⴱ. ⴳ ⵖ ⵓⴳⴰⵢⵢⵓ ⵏⵏⴽ ⵉⵙ ⵉⵖⵉⵢ ⴰⴷ ⵜⴰⴹⵏⵜ, ⵓⵔ ⵔⴰⴷ ⵜⴰⴼⵜ ⵎⴰⴷ ⴰⴽ ⵢⴰⴽⴽⴰⵏ ⴰⴷ ⵜⵛⵛⵜ, ⵉⵖ ⵜⵜ ⵓⵔ ⵜⵉⵡⵉⵜ ⴳ ⵜⴰⵔⵡⴰ ⵏⵏⴽ ⵙⵓⵍ ⵜⵎⵥⵥⵉⵢⵜ, ⵓⵔ ⵔⴰⴷ ⵜⵜ ⴳⵉⴽ ⴰⵡⵉⵏ ⵉⵖ ⵜⵎⵇⵇⵓⵔⵜ.
ⴰⵢⵜ ⴷⴰⵔⵏⵖ, ⵉⵎⵣⵡⵓⵔⴰ ⵏⵏⵖ, ⵙⵙⵏⴽⵔⵏ ⴰⵖ ⴷ ⴳ ⵢⴰⵏ ⵓⵙⴰⵜⴰⵍ ⵢⴰⴹⵏ, ⵓⴼⴰ ⵏ ⴷ ⵍⴰⵥ, ⵓⴼⴰⵏ ⴷ ⵉⵔⴽⴰⵏ ⴷ ⵜⵎⵓⴹⴰⵏ, ⵉⵖ ⵓⴽⴰⵏ ⵜⵛⵛⵉⵜ, ⵜⵙⵓⵜ, ⵜⵍⵙⵜ, ⵀⴰⵏⵏ ⵙⴽⵔⵏ ⴰⵢⵍⵍⵉ ⴼⵍⵍⴰⵙⵏ ⵉⵍⵍⴰⵏ, ⵖ ⴷⴰⵔ ⵉⵅⴼⴰⵡⵏ ⵏⵏⵙⵏ, ⵓⵔ ⵉⵍⵍⵉ ⵎⴰⴷ ⵜⵏ ⵉⵍⴽⵎ.
ⵡⵉⵍⵍⵉ ⵜⵏ ⴷ ⵉⴹⴼⵓⵕⵏ, ⵏⵜⵜⵏⵉ, ⵓⵔ ⴷ ⵓⴼⵉⵏ ⴰⵢⵍⵍⵉ ⴷ ⵓⴼⴰⵏ ⵉⵎⵣⵡⵓⵔⴰ ⵏⵏⵙⵏ, ⵎⵎⴰⵖⵏ ⴰⴷ ⵖⵔⵏ ⵜⴰⵔⵡⴰ ⵏⵏⵙⵏ, ⴰⴷ ⵓⵔ ⵎⵔⵔⵜⵏ ⴳ ⵜⵓⴷⵔⵜ ⵏⵏⵙⵏ ... ⵎⴰⵛⵛ ⵓⵔ ⵙⵙⵉⵏⵏ ⵙ ⵎⴰⵎⵏⴽ, ⵎⵎⴰⵖⵏ ⴰⴷ ⵏⵉⵜ ⵙⵙⴳⵎⵓⵏ ⵜⴰⵔⵡⴰ ⴰⴷ ⵙ ⵎⴽⵍⵍⵉ ⵙ ⵜⵏ ⵙⵙⴳⵎⴰⵏ ⵉⵎⴰⵔⴰⵡⵏ ⵏⵏⵙⵏ.
ⵜⴰⵔⵡⴰ ⵏ ⵡⴰⵙⵙ ⴰⴷ, ⵓⴼⴰⵏ ⴷ ⵍⴰⵥ, ⵍⴰⵥ ⵏ ⵓⵙⵢⴰⴼⴰ, ⵓⵔ ⵍⵙⵉⵏ, ⵓⵔ ⵍⵙⵉⵏ ⵜⵉⵎⵍⵙⵉⵜ ⵏ ⵜⵎⵍⵍⴰ ⴷ ⵜⵓⴼⵔⴰⵢⵉⵏ ⵍⴳⴳⵯⴰⵖⵏⵉⵏ, ⵓⴽⴰⵏ, ⵔⴰⴷ ⵏⵉⵜ ⴷⴰⵖ ⵎⵎⴰⵖⵏ ⴰⴷ ⵙⵙⴳⵎⵓⵏ ⵜⴰⵔⵡⴰ ⵏⵏⵙⵏ ⵙ ⵎⴽⵍⵍⵉ ⵙ ⴳ ⴳⵎⴰⵏ ⵏⵜⵜⵏⵉ.
ⴽⵔⵣⴰⵜ ⵎⴰ ⵜⵎⴳⴳⵔⵎ, ⵀⴰⵏⵏ ⵜⴰⴷⴷⵓⵢⵜ ⵏ ⵕⴱⴱⵉ ⴰⵢⴰⴷ ⵍⵍⵉ ⴰⵙ ⵉⵏⵏⴰ ⵉⵏⵙⵉ, ⴰⵔ ⵜⵣⵣⵓⴳⵓⵣ ⴰⵔ ⵜⵙⵙⴰⵇⵍⴰⵢ.
Aucun commentaire:
Enregistrer un commentaire