IMAZIƔN D TIRRA S TFINAƔ

 

Illa yan umukris bahra yattuyn dar imaziɣn ass ad, slawan akkʷ lliɣ tt inn adlli kkan ar ttinin masd tutlayt nnsn ur tlli g tnbaḍṭ d ur nzḍaṛ ad nara aynna nra s tirra n tfinaɣ. 

Macc ass ad ur sul tlli tmukrist ad, nssn akkʷ masd tamnḍawt n 2011 lliɣ tkcm tmaziɣt tg tunṣibt g tmnḍawt mqqar llan tugtt n tbbayḍaṛin g ussufɣ nns s tillawt macc aylli izlin s tirra ur aɣ sul tga amukris ɣilad. 

Tzḍaṛt ad tarat g ufaysbuk ɣilad s tutlayt d uskkil nnk n tfinaɣ d tɣid ad akkʷ srs tarat kra n tbratt nɣd kra n tnfult tamhlant nna iẓlin s tgrawin nɣd tisntutin n tnbaḍt. Amukris nna illan ɣilad dar imaziɣn akkkʷ slawan akkʷ win Lmɣrib igat masa ttinin masd iɣ nura s uskkil n tfinaɣ g imassn n umsawaḍ nɣd afaysbuk ur rad aɣ irms awd yan taswingmt nnɣ nna nra astt nssiwḍ i umaḍal, ttun masd iɣ turit s tirra nnk ar ttggat addur i ixf nnk d ur rad tqqlt s awd yan ad t ig i uskkil d tutlayt nnk iɣ as t ur tgit kiyyin. 

Llan itsn n middn ɣilad slawann akkʷ winna llanin g iẓẓi n umussu amaziɣ ar bahra ttirin ad ttaran s tutlayt taɛṛabt nɣd tafṛansist afad ad sslkmn awal nɣd taswingmt nna darsn illan, acku ar ttinin masd askkil n tfinaɣ urta t bahra ssnn tugtt n iwdan g umaḍal, d idrus bahra mad rad t iɣr, macc iɣa akkʷ nttini mk ad askkil nnɣ is rad immt ura d t akkʷ sul nẓṛṛa g imassn ad n umsawaḍ. 

Ass ad iqqand imaziɣn akkʷ ad aran inin aylli s syafan g igʷnsiwn nnsn d s tutlayt d uskkil nnsn n tfinaɣ acku s tɣarast ad as rad nssiwḍ yat tbratt nna ittinin mk lli inna umɣnas amqṛan Ɛli Ṣidqi Azayku «awal nnɣ ad aɣ igan iɣ immut nmmut» ɣid rad nini askkil nnɣ ad aɣ igan iɣ immut ur sar rad nsslkm tabratt nna f akkʷ isɣnsa kull mad igan amaziɣ as tt igan masd darnɣ tutlayt darnɣ awal darnɣ askkil srnɣ izlin mklli s darnɣ taɣrma d wamun nna igan idrfi. 

Bumiṣṛ Ɛbdlwaḥd 

 

ⵉⵎⴰⵣⵉⵖⵏ ⴷ ⵜⵉⵔⵔⴰ ⵙ ⵜⴼⵉⵏⴰⵖ 

 ⵉⵍⵍⴰ ⵢⴰⵏ ⵓⵎⵓⴽⵔⵉⵙ ⴱⴰⵀⵔⴰ ⵢⴰⵜⵜⵓⵢⵏ ⴷⴰⵔ ⵉⵎⴰⵣⵉⵖⵏ ⴰⵙⵙ ⴰⴷ, ⵙⵍⴰⵡⴰⵏ ⴰⴽⴽⵯ ⵍⵍⵉⵖ ⵜⵜ ⵉⵏⵏ ⴰⴷⵍⵍⵉ ⴽⴽⴰⵏ ⴰⵔ ⵜⵜⵉⵏⵉⵏ ⵎⴰⵙⴷ ⵜⵓⵜⵍⴰⵢⵜ ⵏⵏⵙⵏ ⵓⵔ ⵜⵍⵍⵉ ⴳ ⵜⵏⴱⴰⴹⵟ ⴷ ⵓⵔ ⵏⵣⴹⴰⵕ ⴰⴷ ⵏⴰⵔⴰ ⴰⵢⵏⵏⴰ ⵏⵔⴰ ⵙ ⵜⵉⵔⵔⴰ ⵏ ⵜⴼⵉⵏⴰⵖ. 

ⵎⴰⵛⵛ ⴰⵙⵙ ⴰⴷ ⵓⵔ ⵙⵓⵍ ⵜⵍⵍⵉ ⵜⵎⵓⴽⵔⵉⵙⵜ ⴰⴷ , ⵏⵙⵙⵏ ⴰⴽⴽⵯ ⵎⴰⵙⴷ ⵜⴰⵎⵏⴹⴰⵡⵜ ⵏ 2011 ⵍⵍⵉⵖ ⵜⴽⵛⵎ ⵜⵎⴰⵣⵉⵖⵜ ⵜⴳ ⵜⵓⵏⵚⵉⴱⵜ ⴳ ⵜⵎⵏⴹⴰⵡⵜ ⵎⵇⵇⴰⵔ ⵍⵍⴰⵏ ⵜⵓⴳⵜⵜ ⵏ ⵜⴱⴱⴰⵢⴹⴰⵕⵉⵏ ⴳ ⵓⵙⵙⵓⴼⵖ ⵏⵏⵙ ⵙ ⵜⵉⵍⵍⴰⵡⵜ ⵎⴰⵛⵛ ⴰⵢⵍⵍⵉ ⵉⵣⵍⵉⵏ ⵙ ⵜⵉⵔⵔⴰ ⵓⵔ ⴰⵖ ⵙⵓⵍ ⵜⴳⴰ ⴰⵎⵓⴽⵔⵉⵙ ⵖⵉⵍⴰⴷ. 

ⵜⵣⴹⴰⵕⵜ ⴰⴷ ⵜⴰⵔⴰⵜ ⴳ ⵓⴼⴰⵢⵙⴱⵓⴽ ⵖⵉⵍⴰⴷ ⵙ ⵜⵓⵜⵍⴰⵢⵜ ⴷ ⵓⵙⴽⴽⵉⵍ ⵏⵏⴽ ⵏ ⵜⴼⵉⵏⴰⵖ ⴷ ⵜⵖⵉⴷ ⴰⴷ ⴰⴽⴽⵯ ⵙⵔⵙ ⵜⴰⵔⴰⵜ ⴽⵔⴰ ⵏ ⵜⴱⵔⴰⵜⵜ ⵏⵖⴷ ⴽⵔⴰ ⵏ ⵜⵏⴼⵓⵍⵜ ⵜⴰⵎⵀⵍⴰⵏⵜ ⵏⵏⴰ ⵉⵥⵍⵉⵏ ⵙ ⵜⴳⵔⴰⵡⵉⵏ ⵏⵖⴷ ⵜⵉⵙⵏⵜⵓⵜⵉⵏ ⵏ ⵜⵏⴱⴰⴹⵜ. ⴰⵎⵓⴽⵔⵉⵙ ⵏⵏⴰ ⵉⵍⵍⴰⵏ ⵖⵉⵍⴰⴷ ⴷⴰⵔ ⵉⵎⴰⵣⵉⵖⵏ ⴰⴽⴽⴽⵯ ⵙⵍⴰⵡⴰⵏ ⴰⴽⴽⵯ ⵡⵉⵏ ⵍⵎⵖⵔⵉⴱ ⵉⴳⴰⵜ ⵎⴰⵙⴰ ⵜⵜⵉⵏⵉⵏ ⵎⴰⵙⴷ ⵉⵖ ⵏⵓⵔⴰ ⵙ ⵓⵙⴽⴽⵉⵍ ⵏ ⵜⴼⵉⵏⴰⵖ ⴳ ⵉⵎⴰⵙⵙⵏ ⵏ ⵓⵎⵙⴰⵡⴰⴹ ⵏⵖⴷ ⴰⴼⴰⵢⵙⴱⵓⴽ ⵓⵔ ⵔⴰⴷ ⴰⵖ ⵉⵔⵎⵙ ⴰⵡⴷ ⵢⴰⵏ ⵜⴰⵙⵡⵉⵏⴳⵎⵜ ⵏⵏⵖ ⵏⵏⴰ ⵏⵔⴰ ⴰⵙⵜⵜ ⵏⵙⵙⵉⵡⴹ ⵉ ⵓⵎⴰⴹⴰⵍ, ⵜⵜⵓⵏ ⵎⴰⵙⴷ ⵉⵖ ⵜⵓⵔⵉⵜ ⵙ ⵜⵉⵔⵔⴰ ⵏⵏⴽ ⴰⵔ ⵜⵜⴳⴳⴰⵜ ⴰⴷⴷⵓⵔ ⵉ ⵉⵅⴼ ⵏⵏⴽ ⴷ ⵓⵔ ⵔⴰⴷ ⵜⵇⵇⵍⵜ ⵙ ⴰⵡⴷ ⵢⴰⵏ ⴰⴷ ⵜ ⵉⴳ ⵉ ⵓⵙⴽⴽⵉⵍ ⴷ ⵜⵓⵜⵍⴰⵢⵜ ⵏⵏⴽ ⵉⵖ ⴰⵙ ⵜ ⵓⵔ ⵜⴳⵉⵜ ⴽⵉⵢⵢⵉⵏ. 

ⵍⵍⴰⵏ ⵉⵜⵙⵏ ⵏ ⵎⵉⴷⴷⵏ ⵖⵉⵍⴰⴷ ⵙⵍⴰⵡⴰⵏⵏ ⴰⴽⴽⵯ ⵡⵉⵏⵏⴰ ⵍⵍⴰⵏⵉⵏ ⴳ ⵉⵥⵥⵉ ⵏ ⵓⵎⵓⵙⵙⵓ ⴰⵎⴰⵣⵉⵖ ⴰⵔ ⴱⴰⵀⵔⴰ ⵜⵜⵉⵔⵉⵏ ⴰⴷ ⵜⵜⴰⵔⴰⵏ ⵙ ⵜⵓⵜⵍⴰⵢⵜ ⵜⴰⵄⵕⴰⴱⵜ ⵏⵖⴷ ⵜⴰⴼⵕⴰⵏⵙⵉⵙⵜ ⴰⴼⴰⴷ ⴰⴷ ⵙⵙⵍⴽⵎⵏ ⴰⵡⴰⵍ ⵏⵖⴷ ⵜⴰⵙⵡⵉⵏⴳⵎⵜ ⵏⵏⴰ ⴷⴰⵔⵙⵏ ⵉⵍⵍⴰⵏ, ⴰⵛⴽⵓ ⴰⵔ ⵜⵜⵉⵏⵉⵏ ⵎⴰⵙⴷ ⴰⵙⴽⴽⵉⵍ ⵏ ⵜⴼⵉⵏⴰⵖ ⵓⵔⵜⴰ ⵜ ⴱⴰⵀⵔⴰ ⵙⵙⵏⵏ ⵜⵓⴳⵜⵜ ⵏ ⵉⵡⴷⴰⵏ ⴳ ⵓⵎⴰⴹⴰⵍ , ⴷ ⵉⴷⵔⵓⵙ ⴱⴰⵀⵔⴰ ⵎⴰⴷ ⵔⴰⴷ ⵜ ⵉⵖⵔ, ⵎⴰⵛⵛ ⵉⵖⴰ ⴰⴽⴽⵯ ⵏⵜⵜⵉⵏⵉ ⵎⴽ ⴰⴷ ⴰⵙⴽⴽⵉⵍ ⵏⵏⵖ ⵉⵙ ⵔⴰⴷ ⵉⵎⵎⵜ ⵓⵔⴰ ⴷ ⵜ ⴰⴽⴽⵯ ⵙⵓⵍ ⵏⵥⵕⵕⴰ ⴳ ⵉⵎⴰⵙⵙⵏ ⴰⴷ ⵏ ⵓⵎⵙⴰⵡⴰⴹ. 

ⴰⵙⵙ ⴰⴷ ⵉⵇⵇⴰⵏⴷ ⵉⵎⴰⵣⵉⵖⵏ ⴰⴽⴽⵯ ⴰⴷ ⴰⵔⴰⵏ ⵉⵏⵉⵏ ⴰⵢⵍⵍⵉ ⵙ ⵙⵢⴰⴼⴰⵏ ⴳ ⵉⴳⵯⵏⵙⵉⵡⵏ ⵏⵏⵙⵏ ⴷ ⵙ ⵜⵓⵜⵍⴰⵢⵜ ⴷ ⵓⵙⴽⴽⵉⵍ ⵏⵏⵙⵏ ⵏ ⵜⴼⵉⵏⴰⵖ ⴰⵛⴽⵓ ⵙ ⵜⵖⴰⵔⴰⵙⵜ ⴰⴷ ⴰⵙ ⵔⴰⴷ ⵏⵙⵙⵉⵡⴹ ⵢⴰⵜ ⵜⴱⵔⴰⵜⵜ ⵏⵏⴰ ⵉⵜⵜⵉⵏⵉⵏ ⵎⴽ ⵍⵍⵉ ⵉⵏⵏⴰ ⵓⵎⵖⵏⴰⵙ ⴰⵎⵇⵕⴰⵏ ⵄⵍⵉ ⵚⵉⴷⵇⵉ ⴰⵣⴰⵢⴽⵓ «ⴰⵡⴰⵍ ⵏⵏⵖ ⴰⴷ ⴰⵖ ⵉⴳⴰⵏ ⵉⵖ ⵉⵎⵎⵓⵜ ⵏⵎⵎⵓⵜ» ⵖⵉⴷ ⵔⴰⴷ ⵏⵉⵏⵉ ⴰⵙⴽⴽⵉⵍ ⵏⵏⵖ ⴰⴷ ⴰⵖ ⵉⴳⴰⵏ ⵉⵖ ⵉⵎⵎⵓⵜ ⵓⵔ ⵙⴰⵔ ⵔⴰⴷ ⵏⵙⵙⵍⴽⵎ ⵜⴰⴱⵔⴰⵜⵜ ⵏⵏⴰ ⴼ ⴰⴽⴽⵯ ⵉⵙⵖⵏⵙⴰ ⴽⵓⵍⵍ ⵎⴰⴷ ⵉⴳⴰⵏ ⴰⵎⴰⵣⵉⵖ ⴰⵙ ⵜⵜ ⵉⴳⴰⵏ ⵎⴰⵙⴷ ⴷⴰⵔⵏⵖ ⵜⵓⵜⵍⴰⵢⵜ ⴷⴰⵔⵏⵖ ⴰⵡⴰⵍ ⴷⴰⵔⵏⵖ ⴰⵙⴽⴽⵉⵍ ⵙⵔⵏⵖ ⵉⵣⵍⵉⵏ ⵎⴽⵍⵍⵉ ⵙ ⴷⴰⵔⵏⵖ ⵜⴰⵖⵔⵎⴰ ⴷ ⵡⴰⵎⵓⵏ ⵏⵏⴰ ⵉⴳⴰⵏ ⵉⴷⵔⴼⵉ. 

 ⴱⵓⵎⵉⵚⵕ ⵄⴱⴷⵍⵡⴰⵃⴷ